Sprzedōm Ôpla Vectra C 1.9 CDTi 120KM.
Ôpel to je rocznik 2006r., sprowadzōny na Ślōnsk we 2010r. Auto przōdij jeździło we Hiszpanii. Niy dosyć, że bez sztyry lata niy widziało polskij zimy, to jeszcze pewnikiym jeździył nim jaki szwarny Alvaro. Tōż jak chcesz mieć powodzynie u dziouchōw jak te Hiszpany, co przijeżdżajōm do nos na Erazmusa, to tako hiszpańsko Vectra na zicher Ci w tym pōmoże.
We 2010r. auto zjechało do Polski i kupiōł je mōj fater. Jeździył Vectrōm do 2014r. i wtynczos sprzedoł ja mie. Ôd 2010r. do 2015r. auto bōło durś garażowane. Ôd 2015r. już mynij, ale za to stoło przi samym kościele w Katowicach-Zołynżu, tōż te auto bōło czynścij na mszy niż twoja ōma we adwyncie, a sōm świynty Krzisztof już dzwōniōł, że chce go kupić, ale w kōńcu mu Pōnboczek niy pozwolōł, bo widzioł, co tyn Alvaro w tym aucie robiōł.
Auto bōło serwisowane ino w 3 miyjscach: ASO Opel we Chorzowie (Delta Plus), Basik Auto we Zabrzu i we Norauto w Katowicach. Na wszyjske naprawy mōm papiōry. A we Ôplu we Chorzowie czynsto wymiyniōłech nawet ôlyj i filtry (tajle ôryginalne ze Opla). Zresztōm jak zapytocie takigo pana Damiana, co tam robi, to bydzie pewnie kojarzył tego pierōńskigo kliynta, co jeździōł 3 razy poprowiać zbieżność i durś pisoł jakeś maile. Ale generalnie serwis sie chwola.
No, roz bōło tyż serwisowane we ASO Opla we Wiedniu. Wiycie, jechołech sie już do dōm i ôroz na skrziżowaniu słysza jakiś dźwiynk, kery mi sie niy podobo (i już tyż słysza, jak mi geld ulatuje ze portmanyja). Zjyżdżōm do ASO, kere bōło zaro ôbok, chopy badajōm auto i słysza wyrok: niy pojedzie – jakeś tajle ze alternatora i posek do wymiany, do tego fedra pynkniynto. Na szczynście chop tam bōł Serbym i wiedzioł, co to do nos z Polski znaczy PŁACIĆ W OJRO, ale zarobiać we złotkach, i doł mi wszyjske rabaty i zamōwiōł zamienniki. Beztōż stykło mi jeszcze na jedna sucho żymła jak jechołech do dōm.
Ale wiycie, tajle z Austrii to prawie choby tajle z Niymiec. A NIYMECKE... to sie wōm już nigdy niy zepsuje.
Wyposażynie je bogate choby ōnkel ze Dortmundu:
- autōmatyczno klima dwustrefowo, 4x nawiywy tyż ze zadku
- systym audio Blaupunkt, radio z CD, 6 głośnikōw
- el. szyby z przodku i ze zadku
- kōntrola trakcji
- 6 poduszek, kurtyny boczne
- zic ôd kerowcy fol regulowany (dobre na heksynszus)
- cyntralny zomek, immobilizer
- tympomat*
*Niykerzi godajōm, co tympomat w Polsce sie niy przidowo – niy mōmy takich prostych i dugich autobanōw jak w Niymcach abo we Ameryce. A jo im godōm: psinco prowda. Jo tympomatu używōm z powodzyniym ôd lot. Jak? Do wyprzedzanio policmajstrōw ze drogówki. Wiycie, je ôgraniczynie do 50km/h, fajno dwupasmowo droga i tyn modry safety car jedzie 50. I cało raja autōw za nim. A wtynczos jo ustawiōm sie tympomat tak na 58km/h i CISNA.
Generalnie jeżech fest z tego auta zadowolōny: mo fajne, miynke i kōmfortowe zawieszynie, kupa placu z przodku i ze zadku (Alvaro), bogate wyposażynie, wysoki mōmynt ôbrotowy - tōż i fajnie jedzie jak sie naciśnie gaz. Do 2018 jeździłech głōwnie trasy, w tym cołko Ojropa – Niymcy, Czechy, Słowacja, Wyngry, Austria, Italio i niy ino. W Niymcach doszołżech do 210km/h. Poli 4,8-5,2l w trasie, 6,5-7,0l w miyście (7,0 to ale już zima). Teroz kupiłech bynzyna, tōż byda tynsknić.
Co istotnego zrobiyłech we ôstatnim czasie?
- ôlyj + filtry – 06.2019
- fol serwis klimy – 06.2019
- geometria – 05.2019 (ASO)
- rozrzōnd – 05.2018 przi przebiegu 270 000 km (ASO)
- pōmpa vaccum, klocki + tarcze tył – 05.2018
- fedry z przodku, pasek alternatora, łōnczniki stabilizatora i jeszcze pora rzeczy po niymecku – 2018 (ASO)
- fol regeneracjo reflektorōw z przodku – 2017
- rozrusznik – 2017
- dwumas – 2017
Przed wystawiyniym auta bołech na SKP – wszystko OK, ino je letki luz na jednym sworzniu (mōm papiōr). Auto je bez DPF, tōż czasym przi gazie na fol poradzi zakopcić na chwila. Ale robiyłech w 2018 test zadymiynio i wyloz OK.
Kej idzie ô ôlyj, to lołech ino syntetyk 5W40, wymiana co ok. 10k km i zawdy z kōmpletym filtrōw (zwykle na tajlach Opla). Auto niy biere ANI GRAMA ôleju, nic. Przodzij miołech Nissana Primera i to pierōństwo żarło ôlyj choby grubiorz karminadle po szychcie - poradziło spolić i 1 liter na 500km. Sam je spokōj, żodnych dolywek etc.
Poza tym wszyjske wymiany abo na taljach Opla abo na topie zamiennikōw (amortyzatory Monroe, tarcze + klocki Textar, Bosch, sprzyngło LUK, rozrzōnd INA etc).
Ôpōny mōm letnie Continental Conti PremiumContact, zimōwki 2x Continental Conti WinterContact + 2x Barum Polaris 5. Bōły 4 Continentale, ale chyciōłech pana we Zakopanym. Z przodku, na kole napyndowym. Stołech we dolinie, tōż musiołech wjeżdżać pod tako epno ôśniyżono gōra na jednyj letnij zapasōwce. Fajny szpas, polecōm, zjeżdzołech na dōł choby Piotr Żyła ze rozbiegu na Wielkij Krokwi.
Co je do zrobiynio/zbadanio?
- sworzyń wahacza z lewego przodku mo letki luz
- przi dojyżaniu do świateł na luzie czasym spadajōm mu ôbroty – pytołech sie w ASO i godali, co „tyn typ tak mo”; tak tyż piszōm na forach i jo tak jeżdża już ze dwa lata, ale dowōm znać
- rdzy na blasze niy ma. Na podwoziu je trocha, ale niy wiyncyj, jak we bele jakim inkszym aucie z tego rocznika. Trza sie karnōnć do blachorza na konserwacja przed ziymōm i bydzie OK
Auto je bezwypadkowe. Miało ino jedne zderzynie z dzikiym w 2014 – mōm zdjyńcia (auta, niy dzika). Pierōn przeżył i pitnōł, tōż niy zapytołech sie go ô OC i musiołech to robić z autocasco. Wymieniōny bōł błotnik, lampa i zderzak (przi tyj wartości to szkoda całkowito oczywiście). Przedni pas niy ruszony. Może kajś jeszcze trefia kosztorys.
Poza tym jakeś parkingowe pierōństwa, zderzak ze zadku dwa razy i roz lampa. Co bōło przed 2010r. – niy wyiym, jak kejś bōł rzeczoznawca do AC to badoł laker i wylazło, co sōm czasym kajś ekstra cieniowania, ale szpachli nikaj niy ma. Podłużnice całe, wszyjske szyby oryginalne.
Za wiela idzie go dostać?
Cyna je do negocjacji, ale tyż prosza bez telefōnōw typu „biera go, ale dejcie rabat 5000zł, coby mi sie paliwo zwrōciło”. Chyba, pierōmbol, lotnicze. Przebieg je ôryginalny – taksiorze, z kerymi żech godoł padali, co te auta spokojnie do 500k dojeżdżajōm. Ale mogesz tyż sie wziōnć sie ôd handlyrza jakigo Passata w TDI, co mo 180 tysiyncy przebiegu i Niymiyc po niym płakoł w Rajchu (chyba ze śmiychu, jak mu spod ze lawety).
Zawdy tyż idzie pojechać do jakigoś Mirka na plac i zamōwić ditejling licznika – ustowi Ci w tyj Vectrze jakeś fajne 100 tysiyncy (abo i nawet i 10 jak dołożysz flaszka sznapsa).
OC do 12.2019, przeglōnd do 09.2019.
I pamiyntej: Alvaro.
Kōntakt: adrian@ponaszymu.pl, tel. 609 363 932 (godz. 12.00-20.00).
Za zdjyńcia dziynkuja Tadkowi Żalikowi (Wytwórnia Tortur Filmowych).
PS. Ôferty ze Zogłymbio i Warszawy tyż przijmuja. Przekłod gratis.